Os mariscadores da Illa denuncian que este ano, como nos anteriores, os inspectores pesqueiros da Xunta tiraron moito marisco que estaba fondeado ...... en condicións perfectamente legais e de identificación e mesmo pretendían levarse varios quilos de nécora, centola e camarón con eles.
Os feitos que motivaron este profundo malestar tiveron lugar este venres pola tarde. Segundo estes traballadores, cando estaban comendo, os inspectores de pesca chegaron en dúas lanchas tipo zodiac con mergulladores a bordo para levantar os copes onde eles gardan o marisco fondeado ata a hora da subasta. O que diferencia esta inspección dunha rutinaria, é que os inspectores tiraron ó mar o contido de varios copes identificados e nalgúns casos colleron o seu contido: camarón, centolo e nécora e levárono consigo; no canto de devolvelos ó mar e formular a correspondente denuncia.
A voz correu rapidamente entre os mariscadores de a flote da Illa que acudiron a onde se atopaba o dispositivo de vixilancia a pedir explicacións. Os inspectores aseguráronlles, nun primeiro termo, que o marisco estaba sen identificar. Unha vez que chegaron onde estaban os inspectores, varios mariscadores comprobaron como algunha nasa e cope que tiñan a bordo decomisados aínda tiñan pendurada a correspondente identificación. Ante esta evidencia, os inspectores desculpáronse asegurando que se trataba dun erro, pero sen chegar a devolver o marisco de primeira calidade que incautaran. Foi entón cando preto de 50 traballadores decidiron retelos na zona de Pe de Serrada ata que lle devolveran o marisco. A forte mobilización social fixo mester a intervención de axentes da Garda Civil.
Os afectados a as testemuñas aseguran que eles queren que se leven inspeccións deste tipo para acabar co furtivismo; porén opóñense a práctica habitual de que cada ano, por estas datas, estes empregados da Xunta aproveiten o seu cargo para encher as súas neveiras cun marisco de primeira calidade e que é froito do seu traballo.
Desde a Consellería de Pesca da Xunta de Galicia aseguran que se intensificaron estas inspeccións da zona, á raíz das peticións de varias confrarías da zona respecto a vieira. Deste xeito, na inspección deste venres decomisáronse varias gaiolas que contiñan vieira ilegal nesta localidade. E a maiores, apreixaron tamén centola e algún camarón e nécora. O suceso orixe do conflicto, segundo o ente autonómico, foi unha partida de marisco que un traballador identificou como seu e que, ó comprobar que a documentación era correcta, lle foi devolta. Segundo Pesca, o marisco que se puideron levar os inspectores era ilegal e irá a parar, como é habitual nestes casos, a un centro de caridade.
Redacción Salnés
